Lu scruscio di 'na vasata

Lu sapiti chi scruscio fa 'na vasata?

Fa lu scruscio di milli ciancianeddi,

di milli coccia d'acqua caruti da 'ncelu,

di centu cannati chini di diamanti,

di centu viulina e di milli cantanti.

'Sti vasati fannu 'stu scrusciu

quannu si dùnanu cu disideriu,

cu passioni, cu amuri, cu affettu,

tràsinu 'nta lu cori,'nta lu pettu.

Cchiù forti è lu scrusciu

cchiù duci è la vasata

e lu sapuri resta

pi tutta la jurnata.

Cc'è la vasatedda,

la vasata e la vasatuna,

la megliu è chidda

quannu cu amuri si duna.

'Na vasata rata di matina

fa tantu scrusciu

ca s'addiviglia

puru la vicina.

Cu 'na vasata data sutta li cuperti

senti la musica di milli cuncerti.

Cu 'na vasata data cu tutti li sentimenti

senti tutti li campani di lu continenti.

Si nun ci criditi

facìti la prova,

'na vasata cu lu scrusciu

la vita vi rinnova.